Sunday, January 15, 2017

ন ডোরানদে মানজো সিদু ভুদতুনউনে দেঘা দি ন পারন

চীন দেজঅত চিঙ নাঙে এক রাজা আমলঅত ই চিনু নাঙে এগগো লেঘ্যিয়্যে এলঅ। ত্যা এ ভুদঅ পজ্জননো তা বাপ ইআও এনঅত্তুন শুন্যে। ইআও শুন্যে তা আজু বাপপো জুন শেঙঅত্তুন।  জুন শেঙে আরঅ কাআত্তুন শুন্যে সিআন হবর পাআ ন জাই। তবে এ পজ্জননো কধা জেক জেক কধা, ইওত কোনো মিঝে কধা নেই।
ঙি চেঙ নাঙে এগ্গান শঅরঅত চিআঙ স্যান মাঙ নাঙে একজনে এলঅ। ত্যা এলঅ হুব সাহজী, বলীবন্দ। হালিক ত্যা এলঅ অমহদঅ একবুচ্যা, আর মাধাবোত ঘিলু এলঅদে কম। সে বাদেও ত্যা এলঅ হুব নাদা, থাউইয়্যে ন এলঅ ত্যা। একবার ত্যা কোনো একজনঅত্তুন শুনিলঅ, তারাা শঅরঅ কুরে শুঙ তিঙ পো নাঙে একজনে ভুদঅ বেআর হুরি থাউইয়্যে উইয়্যে।
এ কধাআন শুনিনেই তাআত্তুন ভুদঅ বেআর গুরি থাউইয়্যে অহবার পরানে কঅলঅ।  ত্যা মনে মনে কঅলঅ, মুই দ সাহজবলা আঘঙ, আর বলঅ আঘে মঅর অমহদঅ। সুঙ মানুজচো ‍জুনি ভুদঅ ধুরিনেই বেআর গুরি থাউইয়্যে ওই পারে, সালেন মুিই কিত্তেই ন পারিম? ত্যা কলঅ, ভুদতুনউনোরে মুই পত্তি রেদোত ধুরিম, তারপর তারা কিএত স্যাপ(থুথু) ফেলেই দিম। সে পরে তারা ছাগল অহবাক। আর তারা ভুদ ওই ন পারিবাক। পরে তারারে বাজারঅত নেজেনেই বিজি দিলে মুই থাউইয়্যে ওই পারিম। মুই থাউইয়্যে অহলে থাআজা মদ হেই পারিম আর হাজি হেই পারিম।
ইআন চিদে গুরি ত্যা কুদু ভুদ আঘন সে হবর ধরা শুরু গললঅ। ত্যা হবর পেলঅ চিঙচেঙ নাঙে এগগান শঅরঅত ভুদ আঘঅন। সিদু ভিলি মরা মানজোরে যে জাগাত রাঘানে সে কুরেকারে ভুদঅ জালাই কনঅজনে সাচসাচ অহবার পরে থ্যাঙঅ ন দোন।  এ কধা শুনি ত্যা সিদু জেইনেই ভুদ ধুরিবঅ চিদে ‍গুরিলঅ।
চিআঙে স্যান মাঙ গাচাচোই এগগো লুধিক বানেলঅ। আর সমারে লঅলঅ এগ্গান লাম্বা দুড়ি। তারপরে ত্যা চিঙচেঙ শঅরঅত জেলঅ। সিদু জেইনেই রেদোত ত্যা মরা মানুজ রাঘান্দে সিদু রেদোত আহদি আহদি গেলঅ। ত্যা লুগেই লুগেই ভুদতুনউনেও হবর ন পাআন পারাআ মরা মানুজ রাঘান্দে জাগাত জেইনেই চেরোকিত্তে বেড়ানা শুরু গললঅ।  হালিকক একবার দিবার তিনবার চেরবার ত্যা চেরোকিত্তে ঘুরি বেড়েনেইও ভুদঅ পাদা বা হবর নন পেলঅ। ভুদতুনউনে তা মুজুঙে নয়ও এলাক।
সে পরে ত্যা সে শঅরঅত এগগো জমিদারঅর পুরোন এগ্গান ঘরঅত গেলঅ। সিদু ভালক বজর আগে জমিদারজে ভালকজনঅরে মারেই ফেলেইএ।  সিওত ভুদঅ ডরে কনঅজনে ন জেদাক। সিদু চিআঙে রেত্তোবো গাই গাই রেদ কাদেলঅ। হালিক দিবে তিননো পেজা আর কয়েগগো উন্দুর ধাবা দেনার রঅ বাদে ত্যা কোনো কিজুই ন  শুনিলঅ, ন দিঘিলঅ। ভুদতুনউনে তা মুজুঙে দেঘাও ন দিলাক। ত্যা ভজমান মনত দুগ পেলঅ। আর পেরেশান অহলঅ।
তারপরেও ত্যা আহল ন সারিলঅ। ত্যা আরেকদিন রেদোত ভজমান ডাঙর এগ্গান তারুম ঝারঅত গেলঅ। সিআন ভজমান তারুম ঝার এলঅ। মানজে কদাক, সিদু শদে শদে ভুদ থাআন। চিআঙে সিদু ঘনদা কে ঘনদা বুজি থেলঅ, হাপ দি থেলঅ। হালিক ত্যা বানা ঝারঅ পজুপেকক বাদে কিচচু ন দিঘিলঅ। একবার বানা ভালুদ্দুরঅত পঅর ‍গুরিবার এগগো চেরাগ জলেত্তে কিজু এগ্গান দিঘিনেই ত্যা সিদু ঝাদিমাদি জেইনেই চাইওইদে সিআন কিচচু নয়।
ত্যা গোদ রেততো সিদু কাদেনেই বিন্নে পঅর ওইনেই আঝা সারি দিনেই ঘরঅ মুক্কে আহদা ধললঅ। ইঙিরি ত্যা আরঅ নানা জাগাত মাহজমুলো ঘুরি বেড়েলঅ। হালিক ভুদঅ মাজারাও ত্যা লাআপ ন পেলঅ। বানা পেরেশানি হেলঅ।
আঝা সারিনেই ত্যা তা শঅরঅত ফিরি এলঅ। তা এ অবস্তা দিঘিনিই শঅরঅর গেআনি ‍বুদ্ধিবলা মানজে তারে কলাক, ‘চিআঙ, গোদা জিঙানিআন ঘুরি বেড়েলেও তুই ভুদঅ মাজারা লাআপ ন  প্যাবেএ। ভুদতুনউন ত ধুক্কেন সাহজবলা মানজো মুজুঙে ন এবাক। তারা জ্যাক্কেনে হবর পিওন তুই ভুদতুনউনোরে ধুরিনেই তারারে স্যাপ সিদি দিইনেই তারারে ছাগল বানেনেই বাজারঅত বিজি দিবে তারা ইক্কো মুজজো গ্যালেও ত মুজুঙে ন এবাক আর। তুই আঝা সারি দ্যা।
তবে চিআঙে এনজান রমচক্র গুরি ভুদ তোগা লামিবার পরে চিঙচেঙ শঅর আর তা কুরেকারে জাগাআনিত ভুদঅ জালা আর ন এলঅ আর। তা ডরে ভুদতুনউনে বেএক দুরঅত ধেই জিওন্দোই। সেনোত্তেই তা শঅর আর কুরেকারে মানুজচুন তারে হুব বাইনী গুজ্জোন।
এ গলপবো বা পজ্জননো শুনিনেই আমি হবর পেলঅঙ ন ডোরাইদে মানজে ভুদ ন দেঘঅন। সাহজবলা মানজে ভুদ ন দেঘঅন। ভুদ দেঘঅন্দে পাদারাআ মানজে।

No comments:

Post a Comment

সর্বাধিক পঠিত

ইতিহাসের ভ্রান্তি থেকে বিভ্রান্তিকর শিক্ষাঃ পার্বত্য চট্টগ্রাম প্রসংগ-১৯৪৭ সাল

ইতিহাসের ভ্রান্তি থেকে বিভ্রান্তিকর শিক্ষা তারিখঃ ১৬ আগস্ট, ২০১৭ ইতিহাস একটি জাতি বা জাতিসত্তা তথা জাতিসমষ্টিকে নানাভাবে প্রভাবিত কর...