Wednesday, June 11, 2014

পজ্জন: দোজ্যা পানি নুনজো কিঙিরি অহলঅ

[তলে পজ্জননো  জাপান দেজঅ পজ্জন বা রূপকথা। সাগরঅ বা দোজ্জে পানিআন কেঙোরি নুনজো উেইয়ে ইও্ত সে কধা কোআ উইয়ে। পজ্জন বা রূপকথা বো চাঙমা কধায় লেঘা অহলঅ]
ভালকদিন বিদি জিয়ে কধা। মোনো উগুরে এগ্গান আদামঅত থেদাক দি ভেই। দাঙর ভেইবো নাঙান পাগানা(একিনো)। আর চিগোন ভেইবো নাঙ অহলঅ চিজিবো। তারা কুরোকুজ্জে গুরি থেদাক। বড়ভেইবো হুব থাউইয়ে অহলেও তা মনান কুজরো এলঅ। আর চিগোন ভেইবোর কিচচু ন এলঅ। তা ভেইবো ঘরআন এলঅ দাঙর, বিল্ডিঙঅ ধক। আর চিগোন ভেইবো  এলঅ চিগোন এগ্গান শনঅ সিনি দিয়ে ঘরঅত।
একবার চিগোন ভেইবো হুব দুগঅত পুজ্জে। তা ঘরঅত কোনো ভাত চোল ন এলঅ। চেরোকিত্তে ঘূরি চেইনেইও হেবার কিজু ন পেলঅ। আনুধোর দেঘি ত্যা তা বড় ভেইবো সিদু গেলঅ। তাত্তুন কিজু হেবার ভাততোন পেবঅ মনেগুজ্জে।
ত্যা তো বড়ভেইবোরে কলঅ, দা, মুই হুব দুগঅত পুজ্জোঙ। মর ভাততোন নেই, হেই ন পাঙর। পাল্লে মরে কিজু ভাত দ্যা।
সিআন শুনি তা বড়ভেইবো কলঅ, তুই দ হুব আলজি। ত ধূক্কেন আলজিরে মুই কিজু দি ন পারিম। তুই আর ত মোককো দ দিজনে বানা বোই বোই থাগঅ। মুই তোমারে কোনো ভাততোন দি ন পারিম কোইকাই তা বড়ভেইবো তারে ঘরঅত্তুন ধাবেই দিলঅ।
তা ভেই বো মনত দুগে সিত্তুন জেলঅগোই। ত্যা ভাততোন বা হানাপিনে ছাড়া কিঙিরি ঘরঅত জেবঅ সে চিদে গুরিলো। চিদে গত্তে গত্তে ত্যা মেনো উগুরে উধিলঅ। সিদু চেরোকিত্তে তোগেই চেলঅ কোনো হেবার মতঅ কিজু পায় কি না। হালিক ত্যা কিজু ন পেলঅ। ঝাড়অত ত্যা এগ্গো গাচ কাবিয়ে বুড়ো মানজোরে লাআপ পেলঅ। বুড়ো মানুচচো তারে দেঘি কলঅ, গাবুজ্জে, আ কুদু জঅর?
ত্যা বুড়ো মানুচচোরে তা মনঅ কধা, দুগঅ কধা ভাঙি কলঅ। তা বড় ভেইবো যে তারে হেবার দেবার কিজু ন দ্যা সিআনঅ কলঅ।
তা কধা শুনি বুজ্জে তারে কলঅ, মুই দ তরে আর কিজু দি ন পারিম। মুই তরে তেললোই বানিয়ে এগ্গান পিদেদলা দঙর। সিআন তুই ন হেচ। সিআন লোইনেই তুই সোজা ঝাড়অ মুক্কে আহদি যা। সিদু তু্ই গম ভুতঅ আদাম লাআপ প্যাবে। তারা এ পিদেআনি হাদে হুব গম পাআন। তারারে তুই পিাদে হাবেবে। তারা তরে বুউত কিজু দিবার চেবাক। তবে তুই কিজু ন লবে। বানা মাগিবেদে জাদুর পাত্তরবো।
সিআন শুনি চিজিবো ঝাড়অত সুমিলঅ। সিুদ ত্যা ভুতঅ আদামঅ কুরে গেলঅ। স্যাক্কেনে ভুতদাঘি তারা ঘরঅ চাল সোর গত্তন। তারা চিজিবোরে কলাক তারারে এক্কেনা বল দিবাত্তেই। চিজিবো তারারে কামঅত বল দি’লঅ। গম ভুত-উনে চিজিবোরে হুব গম পেলাক। সে পরে তারা তারে ঘরঅত বোজেলাক।
স্যাক্কেনে এগ্গো ভুত তা আহধত সে পিদেআন দিঘিলো। পিদেআন দিঘি তারা চিজিবো রে কলাক, পিদেআন ত্যা তারারে হাবেব’ কি না। চিজিবো তারারে সে পিদেআন হাবেলঅ।
ব্যাক্কুনে মিলিনেই সে পিদেআন হেনেই পেট ভোরেলাক। তারা হুজি অহলাক। চিজিবোরে কলাক, পিদে দ হাবেলে। সে বদেলে তুই আমাত্তুন জিআন চা’চ সিআন দিবঙ। সিআন কদে ন কদে তারা চিজিবো মুজুঙে হিরে-মণি মানিক আনি দিলাক। সিআন দেঘি চিজিবো আমক অহলঅ। হালিক ত্যা বুজ্জে কধা মনত তুলিলঅ। ত্যা কল’ মর ইআনির দরকার নেই। মরে  তুমি বরঞ্চ জাদু পাত্তরবো দো। সিআন শুনি তারা মনমরা অহলাক। পরে ভালককন চিদে গুরিনেই তারা চিজিবোরে কলাক, মানুচ ভেই তুই হুব গম মানুচ। আমি তরে এ জাদু পাত্তরবো দিলঙ। ইবে কেচ্চাকুচ্চো কোনো পাত্তর নয়। ইবেরে ডেন কিত্তে ঘোরেনেই তু্ই জিআন মাগঅচ সিআন প্যাবে। আর বাম কিত্তে ঘোরেনেই তুই সিআন বন্ধ গুরি রাঘেই পারিবে।
সে পরে ত্যা ভুতদাঘি আদাম ছাড়ি এলঅ। ভুতদাঘি তারে সালাম গুরি ইরিত দিলাক। ত্যা ঘরত লুঙদে লুঙদে রেত অহলঅ। ইন্দি তা মোককো তারে বাচ্চেই থাগত্তে থাগত্তে অহরান উইয়ে। দেরী উইয়ে কিন’ত্তাই চিজিবো হানক্কন তা মোককোত্তু ঝাঝি মারা হেলঅ।
সিন্দি কান ন দিনেই ত্যা তা মোককোরে এগ্গো পাদি বেজেবার কলঅ। পাদি বো বেজেইনেই ত্যা জাদু পাত্তরবো সিওত রাঘেইনেই ডেনকিত্তে ঘুরেনেই কলঅ-
দোল দোল ধান এত্তোক- ভাত এত্তোক-
এত্তোক অতালিয়ে গুরি।
সিআন ক’দে ন ক’দেই ঘর ভরন ভাত-ধান এজানা শুরু গুরিলাক। চিজিবো মোককো সিআন দেঘি চোক তাললোত তুলিলঅ। ত্যা বিচ্চেচ গরঙ ন গরঙ গুরি চেই থেলঅ।
ধান-ভাত এত্তে দেঘিনেই চিজিবো ফাল্লেই উদিলঅ। ত্যা হুব হুজি অহলঅ। ত্যা বাঙ কিত্তে পাত্তরবো ঘুরেনেই ধান-ভাত এজানা বন্ধ গুরি দি’লঅ। সে পরে ত্যা আরকবার পাত্তরবো ডেনকিত্তে ঘুরেনেই মাগিল’-
মাচ এত্তোক চিগোন দাঙর
তাল ওদেনই থা্দোক এককিত্তে।
সিআন ক’দে ন ক’দে তালথিগে চিগোন দাঙর মাচ এককিত্তে তাল অহলাক।
সে পরে ত্যা মাগিল’-
ইক্কে মুই ঘর চাঙ -ঝাদিমাদি
সিআন কোই ন ফুরাদে ঘর এলঅ। সমারে এলঅ হাট-পালঙ-চেয়ার-টেবিল আর নানান কিজু।
ত্যা আর মাগিলঅ হিরে-মণি-মানিক-সোনাদানা আর কত কিজু। এবার চিজিবো তা বড়ভেইবোত্তুন বেচ থাউইয়ে ওই উদিলঅ। তা বড়ভেইত্তুন ইক্কে ইঙজে উদিলঅ।
চিজিবো একবার বেক আদাম্যাউনোরে ভাত হাবেবার নিমন্ত্রণ গুরিল। তারারে ভাতঅ সমারে পিদে-মিষ্টিও হাবেলঅ।
ঘরঅ ভিদিরে এনেই জাদু পাত্তরবোত্তুন পিদে-মিষ্টি-কেক মাগ’দে সলাত তা বড়ভেইবো জানালা সেরেত্তুন তারে চেই থেলঅ। ত্যা দিঘিলঅ, তা গুরো ভেই চিজিবো জাদু পাত্তর ঘূরেনেই কধা ক’লে অতালিয়ে গুরি কেক-মিষ্টি এজানা শুরু গত্তন।
সিআন দেঘি ত্যা রেত অহয় সং বাচ্চেই থেলঅ।
রেত অহলে ব্যাক্কুনে ঘুম জ্যালে ত্যা ‍চুবে চুবে জেনেই জাদু পাত্তরবো চুর গুরিলঅ। সিবে সমারে কয়েগ্গো মিষ্টিও ত্যা লঅলঅ।
কেউ হবর ন পান পারা গুরি ত্যা এগ্গান ন’(নৌকা) লোইনেই দুরঅত এগ্গোন দ্বীপঅত ধেই জেবার চেলঅ। দ্বীপঅত জাদে জাদে তার রেত্তোবো লাগিলঅ। সিদু জেইনেই পেট পুরিলে ত্যা মিষ্টিউন হেলঅ। সে পানি হেলঅ। পানি হেবার পরে তাত্তুন নুন পরানে মাগিলঅ।
সিদু দ কোনো নুন ন এলঅ। তাত্তুন মনত উদিলঅ, জাদু পাত্তরবোত্তুন জিআন মাগে সিআন পাই। ত্যা জাদু পাত্তরবো ঘুরেনেই নুন মাগিলঅ। তালথিগে নুন এজানা শুরু গুরিলঅ।
হালিক ত্যা ভজমান এগ্গান ভুল গুরিলঅ। কিঙিরি নুন এজানা বন্ধ গুরিবঅ সিআন ত্যা হবর  ন পেলঅ। ত্যা বানা নির্দেশ দিবার চেলঅ, নুন এজানা বন্ধর গর। হালিক নুন এজানা বন্ধ ন অহলঅ। তালথিগে অতালিয়ে গুরি নুন এজানা শুরু গুরিলঅ। সে নুন দোজ্জেত পুরিলঅ। নুন বেচ ওইনেই তা ন’আন ডুবিল। সে পরে ত্যা বাজিবাত্তেই র সারিলঅ। হালিক তারে বাজেবার কন’জনে ন এলাক। তা র’বোও কন’জনে ন শুনিলাক।
নুনঅ তলাত পুরিনেই ত্যা মুরি গেলঅ।
সে দ্বীপপোত এবঅসং জাদু পাত্তরবো নুন ধালি জাআর। আর সে নুন দোজ্জেত পুরিনেই দোজ্জে বা সাগরঅ পানিআন নুনজো ‍গুরি দ্যা।
ইদিক্কেন গুরি দোজ্জে পানি নুনজো ওই জিএ।

No comments:

Post a Comment

সর্বাধিক পঠিত

ইতিহাসের ভ্রান্তি থেকে বিভ্রান্তিকর শিক্ষাঃ পার্বত্য চট্টগ্রাম প্রসংগ-১৯৪৭ সাল

ইতিহাসের ভ্রান্তি থেকে বিভ্রান্তিকর শিক্ষা তারিখঃ ১৬ আগস্ট, ২০১৭ ইতিহাস একটি জাতি বা জাতিসত্তা তথা জাতিসমষ্টিকে নানাভাবে প্রভাবিত কর...